Blood Group 'S' Positive

 బ్లడ్‍ గ్రూప్ ‘సేవ’ - పాజిటివ్ 

 

          రాజమండ్రిలో కులమతాలకు అతీతంగా కోవిడ్ మృతులకు అంత్యక్రియలు జరుపుతున్న ఒక బృందం గురించి ఇటీవల బిబిసి తెలుగు వెబ్ సైట్ లో ఒక కథనం  వచ్చింది. ఈ బృందం ఏకంగా కోవిడ్‍ క్వారంటైన్ ను నిర్వహిస్తున్నది. కరోన సోకినవారి ఇళ్ళకు ఆహారం, మందుల్ని పంపిణీ చేస్తున్నది. ఈ బృందానికి నాయకుడు ఆమిర్ పాషా.

 

          నరసాపురం పట్టణంలో కూడ ఇంకో బృదం కోవిడ్ మృతులకు ఇలాంటి సేవల్నే అందిస్తోంది. ఆ బృందానికి నాయకుడు ఫిరోజ్ ఖాన్. లాక్ అవుట్ కాలంలో ఫిరోజ్ ఖాన్ బృందం నరసాపురం పరిసరాల్లోని నిరుపేదలు, వలస కార్మికులకు ఓ నలభై రోజుల పాటు రోజుకు 4 వందల మందికి ఉచిత భోజనం పంపిణి  చేసింది.

 

          హైదరాబాద్ నగర శివారు ప్రాంతాల్లో  హీనా ఖాన్, సమీనా జంట నిరుపేదలు, వలస కార్మికులకు ఆహారం, మందులు ఉచితంగా పంపిణీ చేశారు. 

 

          ఇందులో ఆశ్చర్యమూ, ఆనందమూ కలిగించే విశేషం ఏమంటే, రాజమండ్రి ఆమీర్ పాషా నా మేనత్త ఆమిరున్నీసా మనవడు; మా దాయాది సోదరుడు పాషా కొడుకు. నరసాపురం ఫిరోజ్ ఖాన్ మా పెదనాన్న తురాబ్ అలీ ఖాన్ మనవడు; మా దాయాది సోదరుడు షానవాజ్ ఖాన్ కొడుకు. హైదరాబాద్ సమీన మా మేనత్త మునవ్వరి కుమార్తె. హీనా ఖాన్ మా బాబాయి గులాం మొహిద్దీన్ ఖాన్ సందాని కుమార్తె.

 

          మేమంతా గులాం గౌస్ ఖాన్, గులాం మొహిద్దీన్ ఖాన్ సోదరుల సంతతి. ఒకరికి తెలియకుండ మరొకరం అందరం సమాజ సేవలోనే వున్నామని తెలిసి చాలా ఆనందం వేసింది. మా బ్లడ్ గ్రూపు ‘ఎస్’. ఎస్ ఫర్ సేవ. ‘ఎస్’ ఫర్ సర్విస్.