Danny Notes May 2013

Danny Notes

31 May 2013

అంతర్యుధ్ధం

చైనాతో కొత్తగా ప్రేమలో పడ్డాక, ఈశాన్య సరిహద్దుల్లో సైన్యానికి పనిలేకుండాపోయిందని భారత ప్రభుత్వం భావిస్తున్నట్టుంది. నక్సల్స్ ప్రభావిత గిరిజన ప్రాంతాల్లో సైనిక బలగాలని పంపించాలని భావిస్తోంది. అది అంతర్యుధ్ధం అవుతుందని ప్రభుత్వాధినేతలకు తెలిసినట్టులేదు. రేపు పాకిస్తాన్ తో కూడా ఏదోఒక సర్దుబాటు జరిగితే వాయువ్య సరిహద్దుల్లోని సైన్యాన్ని కూడా దేశం మీదికి దించవచ్చు. వర్గ సరిహద్దే రేపు దేశసరిహద్దు కావచ్చు!!    

Danny Notes, 31 May, 2013

బయ్యారం ఇనప గనులు

బయ్యారం ఇనప గనులపై సాగుతున్న చర్చలు చూస్తుంటే, వాటిని జగన్-అనిల్ కుటుంబానికో, కెసిఆర్ -హరీష్ కుటుంబానికో దక్కించాలనే ఎజెండాలు చెరోవైపు వున్నట్టు అనిపిస్తోంది. గిరిజనప్రాంతంలోని వనరులపై గిరిజనులకే హక్కు కల్పించాలనే ఆదర్శం ఎక్కడా కనిపించడంలేదు. భారత రాజ్యాంగంలో ఐదవ షెడ్యూలు అనేది ఒకటుందని అందరూ మరిచిపోయినట్టున్నారు; గవర్నరుతోసహా!  

Danny Notes

30 May 2013

పగలు రేయి: పశ్చిమ గోదావరి

పాత్రికేయ మిత్రుడు షేక్ కరీం ఈరోజు పోస్టులో ఇరవై ఏడేళ్ళ క్రితం నేను రాసిన ’పగలురేయి పశ్చిమ గోదావరి’ వ్యాసాన్ని ప్రస్తావించాడు.   1986  జనవరిలో ఉదయం దినపత్రికలో అచ్చయిన వ్యాసం ఇది. "ఎప్పుడైనా నీకు అనుభవంలో వున్నదే అర్ధం అవుతుంది. నీకు తెలిసిందే నువ్వు రాయి" అని నాకు తత్వశాస్త్ర పాఠాలు చెప్పిన త్రిపురనేని మధుసూదన రావు ఉపదేశించారు. ఆమేరకు మా స్వంతజిల్లా పశ్చిమ గొదావరి మీద వ్యాసం రాద్దామనుకున్నాను. రాసింది ఆర్ధిక అంశాల మీదే అయినా కాన్సెప్ట్ ను తత్వశాస్త్రం నుండి తీసుకున్నాను. మావో ’వైరుధ్యాలు’ వ్యాసంలో అనేక  ద్వంద్వాల గురించి ప్రస్తావిస్తాడు. గణితంలో ప్లస్, మైనస్, యంత్రశాస్త్రంలో చర్య, ప్రతిచర్య, భౌతిక శాస్త్రంలో ధన విద్యుత్తు, రుణ విద్యుత్తు, రసాయన శాస్త్రంలో సంఘటన, విఘటన, రాజకీయాల్లో యుధ్ధము, శాంతి ఇలా సాగుతుంది వైరుధ్యాల వ్యాసం. ఆ వరుసలో నేను పగలు రేయి అనే ద్వంద్వాన్ని సృష్టించాను. సమాచారం పుష్కలంగా వుండి, కాన్సెప్ట్ కూడా వుంటే వ్యాసం తయారైపొయినట్టే. నాకు అప్పటి వరకు విప్లవ పత్రికల్లో రాసిన అనుభవం మాత్రమే వుంది. ప్రధాన స్రవంతి పత్రికల్లో నేను రాసిన తొలి వ్యాసం అది. రచన శైలిలో ప్రధాన స్రవంతి ప్రమాణాల కోసం మిత్రుడు కే. శ్రీనివాస్ సహాయం తీసుకున్నాను.

ఈ వ్యాసం నాకు చాలా పేరు తెచ్చిపెట్టింది. ఇందులో నేను ప్రస్తావించిన  ’అభివృధ్ధి వైపరీత్యాలు’ అనే కాన్సెప్ట్ ఢిల్లి మిత్రుడు సివీ సుబ్బారావుకు  చాలా నచ్చింది. ఆయన యూనివర్శిటీల స్థాయిలో నా వ్యాసాన్ని ప్రచారం చేశాడు. అలా నాకు ఆర్.ఎస్. రావుగారు పరిచయమయ్యారు.  సంబల్ పూర్ యూనివర్శిటీలో ఆర్.ఎస్. రావుగారు నాతో ఒక మీట్ కూడా ఏర్పాటు చేశారు. తరువాతి కాలంలో ఆర్.ఎస్. రావుగారి దగ్గర నేను రాజకీయార్ధికశాస్త్రంలో అనేక మెళుకువలు  నేర్చుకున్నాను.

ఆ సమయంలోనే ఆర్.ఎస్. రావుగారు ’అభివృధ్ధి వెలుగు నీడలు’ అనే పెద్ద వ్యాసం రాశారు. ఆ వ్యాసం ప్రేరణతో నేను ’పగలురేయి పశ్చిమగోదావరి’ వ్యాసం రాశానని కొందరు అనుకోవడానికి ఆస్కారం ఉంది. కానీ, అది నిజంకాదు. నా వ్యాసం వచ్చిన కొన్ని నెలల తరువాత ఆర్.ఎస్. రావుగారి వ్యాసం వచ్చింది. అయినప్పటికీ,  ఆ రంగంలో వారు గొప్పవారు. నాకు గురువుగారు. 

Danny Notes

30 May 2013

రానున్న ఉప్పెనకు తొలి సంకేతం

ఆంధ్రప్రదేశ్  రాజకీయాల్లో ప్రస్తుతం  కొనసాగుతున్న నాలుగు స్థంభాలాట 2014 ఎన్నికలతో ముగుస్తుంది. జగన్ గాలి, కేసిఆర్ తంత్రం, చంద్రబాబు చక్రం తిప్పడాలు, కిరణ్ కుమార్ రెడ్ది ఆరాటం, ఈ నాలుగు స్థంభాలాట మధ్య నాలుగు సీట్లు తమ సంచిలో వేసుకుందామనుకునే కమలనాధులు, కమ్యూనిస్టుల ఆశలు వగయిరాలన్నీ వచ్చే ఎన్నికల్లో ఒక కొలిక్కి వస్తాయి. ఈ నాలుగు స్థంభాలాట సుడిగుండంలో రాష్ట్రమంతటా దాదాపు నాలుగేళ్ళుగా అనేక ప్రజా సమస్యలు  మూలన పడిపోయాయి. ఒక్కసారి ఎన్నికల హోరు తగ్గగానే, అవి ముందుకు వస్తాయి. ఈనాడు మనకు ప్రముఖంగా కనిపిస్తున్న పార్టీలు, వ్యక్తుల్ని చరిత్ర చెత్త బుట్టలో పడేసి, ఒక ప్రజా ఉద్యమం ఉవ్వెత్తున లేస్తుంది.

మొన్నటి ఛత్తీస్ గఢ్ ’కర్మ’కాండ రెండేళ్ల క్రితం జరిగివుంటే ప్రధాన స్రవంతి రాజకీయపార్టీలు ఒక నెల రోజులు ఎడతెరపిలేకుండా గగ్గోలు పెట్టివుండేవి. ఇప్పటి పరిస్థితి వేరు. ఎవరూ పెద్దగా నోరు విప్పడంలేదు. ’కర్మ’కాండ మీద ప్రధాన స్రవంతిలోనే ఒక పరోక్ష  ఆమోదాంశం కనిపిస్తున్నది. రానున్న ఉప్పెనకు ఇది తొలి సంకేతం.

Danny Notes

30 May 2013

ఏబీకే కల్ట్

తెలుగు జర్నలిజంలో ఏబీకే ప్రసాద్ ఒక కల్ట్ ఫిగర్. నేనూ ఆ కల్ట్ లో సభ్యుడ్నే. ఏబీకే శిష్యుడిగానే నేను వర్కింగ్ జర్నలిస్టుగా మారాను. ప్రింట్ మీడియా కొలువులో నాకు ఆదియూ అంతమూ  ఏబీకే గారే. మొదట్లో ఆంధ్రభూమిలో, చివర్లో ఆంధ్రప్రభలో వారి దగ్గర పనిచేశాను. 

Danny Notes

28 May 2013

విబంధుడు - వాడ్రేవు చినవీరభద్రుడు

శీర్షికలు సాహిత్య పేజీ ఇన్ చార్జీల   Proprietary, Discretion  అక్కడ రచయితలు కాలో, వేలో పెట్టగలిగే ఆస్కారంలేదు. విబంధుడు పదం కొత్తగా విన్నట్టు అనిపించింది. బంధాలూ లేనివాడేమో అనుకున్నాను. శీర్షికను వదిలేస్తే, త్రిపుర మీద వాడ్రేవు చినవీభద్రుడు రాసిన  వ్యాసం (ఆంధ్రజ్యోతి) చాలా హృద్యంగా వుంది. సమాచారం వుంది, విశ్లేషణవుంది. ఇటీవలి కాలంలో వాడ్రేవు చినవీభద్రుడు, పసునూరి రవీందర్ ల రచనల్ని  నేను ఇష్టంగా చదువుతున్నాను. వాళ్ళిద్దరికీ సాహిత్యమూ తెలుసు; తత్వశాస్త్రమూ తెలుసు, సామాజిక కోణమూ తెలుసు. ఈ మూడూ తెలిసినవారి రచనల్నే నేను చదవగలుగుతున్నాను.

Danny Notes

28 May 2013

హింసా-ప్రతిహింసా

హింస ద్వారానే పాలకులు పాలించగలుగుతారు. ప్రతిహింస ద్వారానే ప్రజలు దాన్ని నిలవరించ గలుగుతారు. పరస్పర విరుధ్ధ ఆర్ధిక ప్రయోజనాలుండే వర్గ సమాజంలో ఇది ప్రాధమిక నియమం. వర్గసమాజం వున్నంత వరకు ఈ నియమంలో మార్పు వుండదు.

ఆధునిక సమాజాల్లో ఈ హింసా-ప్రతిహింసా ప్రక్రియలు ఎప్పటికప్పుడు ఆధునిక రూపాన్ని సంతరించుకుని ముందుకు సాగుతుంటాయి. పార్లమెంటరీ ప్రజాస్వామ్యం వాటిల్లో ఒకటి. పాలకుల పరిశోధన-అభివృధ్ధి విభాగాలు, ప్రజల పరిశోధనా-అభివృధ్ది విభాగాలకన్నా, విస్తృతిలో పెద్దవి సారాంశంలో కుటిలమైనవి. ప్రజలు ఒక రూపంలోని దోపిడీ, అణీచివేతలని అర్ధం చేసుకునే లోపలే పాలకులు పది కొత్త రూపాల్లో దోపిడీ, అణీచివేతలని ప్రయోగిస్తుంటాయి. కొంచెం ఆలస్యం అయినా ప్రజలు వాటిని గట్టిగానే తిప్పికొడతారు. రాక్షసులు ఎన్ని రకాల  కామరూపాల్లో వచ్చినప్పటికీ, చివరకు రాక్షస రూపం బయటపడిపోయి చనిపోతారని జానపదకథల్లో చదువుకున్నాం. ఇక్కడా సరిగ్గా  అలానే జరుగుతుంది.

నన్ను కొంచెం నిరుత్సాహపరిచే అంశం ఏమంటే, నేను అభిమానించే విప్లవసంస్థల ప్రస్తుత నాయకులు గత తరాలంత ముందుచూపుతోనూలేరు, చురుగ్గానూలేరు. మరోవైపు, విప్లవశ్రేణుల్ని పాలకవర్గాలు చాలా వుధృతంగా చెడగొట్టేస్తున్నాయి; లొంగదీసుకుంటున్నాయి; రెండూ కుదరకపోతే చంపేస్తున్నాయి. సకలదేశాల శ్రామికులు ఏకం అవ్వకముందే, సకల దేశాల పాలకులు ఏకం అయిపోతున్నారు.

భాగవతంలో, శ్రీకృష్ణుడ్ని గర్భంలోనే చంపేయడానికి కంసుడు ప్రయత్నిస్తాడు. పాలుతాగే వయసులో, నడక నేరుస్తున్న వయసులో, అలా అనేక దశల్లో అనేక కామరూపుల్ని పంపి చంపాలనుకుంటాడు. ఆ దాడులన్నింటినీ తిప్పికొడుతూ, పెద్దాడయిన శ్రీకృష్ణుడు ఒకరోజు కంసుని సభకే వచ్చి హతం చేస్తాడు. అలాంటి అద్భుతం ఒకటి సమీపభవిష్యత్తులోనే జరుగుతుందని ’నమ్మేవాళ్ళలో’ నేనూ ఒకడ్ని.  అన్ని రోజులూ పాలకులవికావు. ప్రజలకూ తమ రోజు వస్తుంది

Danny Notes

28 May 2013

అహింసామార్గాన్ని పాటించాల్సింది ఎవరూ?

స్వాతంత్ర ఫలాలు అందరికీ అందడమే ముఖ్యం. ఆ కర్తవ్యాన్ని డెభ్భయి యేళ్ల తరువాత కూడా మన పాలకులు పూర్తి చేయలేదు. దిక్కులేనివాళ్లకిచ్చే అంత్యోదయ కార్డుల కోసం భారత ప్రజలు ఇప్పటికీ క్యూల్లో నిలబడుతున్నారు. దీన్ని గట్టిగా ప్రశ్నించే వాళ్ళను హింసావాదులు అంటున్నారు. "ఏ ఉద్యమమైనా అహింసామార్గంలో ఉండాలి" అని ఒక హితబోధ చేస్తున్నారు. దేశానికి స్వాతంత్ర్యం అహింసామార్గంలో "నే" వచ్చిందని ఒక బూటకాన్ని సాంప్రదాయంగా మారుస్తున్నారు. ఇంతకీ ఈ అహింసామార్గాన్ని పాటించాల్సింది ఎవరూ? ప్రభువులా? ప్రజలా? స్వతంత్ర భారత దేశాన్నీ, అందులోని రాష్టాల్నీ, పాలించినవాళ్లలో ఇంత వరకు "అహింసో పరమధర్మం" అనుకున్నవాళ్ళు ఏ ఒక్కరైనా వున్నారా
Danny Notes

27 May 2013

హింసామార్గంలోనే భారత స్వాతంత్రం

భారతదేశానికి  అహింసామార్గంలో స్వాతంత్రం వచ్చిందని నమ్మేవాళ్ళు కొందరు వున్నారు. ఇది నిజం కాదు. రెండో ప్రపంచ యుధ్ధమంతటి నరమేధం జరిగిన తరువాత మనకు స్వాతంత్రం వచ్చింది. అది కూడా, అహింసావాదం మీద ఏమాత్రం నమ్మకంలేని,  ఒక సోషలిస్టు (లేబర్) పార్టి ఇంగ్లండ్ లో అధికారం లోనికి వచ్చిన తరువాత  మనకు స్వాతంత్రం వచ్చింది. అహింసా ప్రవక్తగా భావించే మహాత్మా గాంధీజీ రెండో ప్రపంచ యుధ్ధంలో చిత్రమైన తర్కంతో బ్రిటన్ ను సమర్ధించారు. ౩౦ లక్షల మంది భారత  సైనికులు ఆ యుధ్ధంలో పాల్గోన్నారు. మరోవైపు, శతృవుకు శతృవు మిత్రుడు అనే నినాదంతో సుభాష్ చంద్రబోస్ జపాన్ తో చేతులు కలిపాడు. ఆ మేరకు గాంధీజీకన్నా బోస్ బ్రిటీషువాళ్లను ఎక్కువగా ఇబ్బందిపెట్టాడు. అసలు విషయం ఏమంటే, అప్పటికీ స్వాతంత్రాన్ని ఇవ్వకపోతే, దేశంలో భగత్ సింగ్, అల్లూరి సీతారామరాజు వంటి హింసావాదులు వందలుగా పుట్టుకు వస్తారని బ్రిటిష్ పాలకులు భయపడ్డారు. మధ్యేవర్గం చేతుల్లో  పెట్టడం తమకూ  ప్రయోజనకరం అని భావించి అధికారాన్ని కాంగ్రెస్ కు బదిలీ చేశారు. మనకు చాలా స్పష్టంగా  హింసా మార్గంలోనే స్వాతంత్రం వచ్చింది. 

Danny Notes

27 May 2013

చేసిన పాపము ఊరకపోదు

ఛత్తీస్ గడ్ లో తను చేసిన ’కర్మ’ లకు ఒకడు చనిపోయాడు.  దానితో దేశంలోని అధికార పక్షాలు, ప్రతిపక్షాలు ముక్త కంఠంతో, అహింసామార్గం గురించీ,  భారత రాజ్యాంగం గురించీ,  పార్లమెంటరీ ప్రజాస్వామ్యం గురించి, వాళ్లకే తెలియని ఆదర్శాలు వల్లె వేస్తున్నాయి. కొందరైతే, బాబా సాహెబ్ అంబేడ్కర్ రాసిన రాజ్యాంగం అని మరీ గుర్తుచేస్తున్నారు. కానీ, ఆ చనిపోయినవాడు జీవితంలో ఒక్కసారైనా   అహింసా సూత్రాల్ని ఆచరించాడా? భారత రాజ్యాంగాన్ని గుర్తించాడా? కనీసం, పార్లమెంటరీ ప్రజాస్వామ్య విలువలనైనా పాటించాడా? అనే అనుమానం మాత్రం ఒక్కరికీ వచ్చినట్టులేదు.

  

Danny Notes

27 May 2013

ఎమర్జెన్సీకి  వారసుడొచ్చాడు

"మా అమ్మ సోనియా గాంధీకి సహనం ఎక్కువ. నేను మా నాయనమ్మ  ఇందిరాగాంధి ఒళ్ళో పెరిగినవాడిని" -  రాహుల్ గాంధి.

("మా అమ్మ సోనియా గాంధీకి సహనం ఎక్కువ. మంత్రుల అవినీతి బయటపడిపోతే రాజీనామాలతో సరిపెట్టింది. అదే మా నాయనమ్మ ఇందిరాగాంధి అయితే విపక్షాలు విమర్శలకు దిగినప్పుడు ఏకంగా ఎమర్జెన్సీ  పెట్టేది. నాది  ఇందిరాగాంధి తత్వం") 

Danny Notes

27 May 2013

ఉద్యమం - లాబీయింగ్

తెలంగాణ ప్రత్యేక రాష్ట్ర సాధనకు ఇప్పుడు రెండు మార్గాలున్నాయి.

ఒకటి ఉద్యమమార్గం; రెండు లాబియింగ్ మార్గం.

Danny Notes

27 May 2013  

భిన్నత్వంలో ఏకత్వం

కల్వకుంట చంద్రశేఖర రావు, లగడపాటి రాజగోపాల్ ఇద్దరూ రాజకీయాల్లో బద్ద శత్రువులుగా కనిపిస్తారు. నిజానికి ఇద్దరి రాజకీయ విధానాలూ ఒక్కటే. కెసిఆర్ ఢిల్లీలో లాబీయింగ్ చేసి, తెలంగాణ తెద్దామనుకుంటారు. మరోవైపు లగడపాటి కూడా ఢిల్లీలో లాబీయింగ్ చేసి తెలంగాణను అడ్డుకోవాలనుకుంటారు.

Danny Notes

27 May 2013

ఉద్యమంలో లాబీయింగ్ వుండదు. లాబీయింగులో ఉద్యమం ఉండదు. ఉద్యమంలో ఎప్పుడూ ప్రజలే ప్రయోజనం పొందుతారు. లాబీయింగ్ లో ఎప్పుడు వ్యక్తులే లాభపడతారు.       

మతోన్మాదం, జాతియోన్మాదం

27 May 2013

మతోన్మాదంలేని జాతియోన్మాదం మనకు సాధ్యమా? 

వడగాల్పులు

26 May 2013

వడగాల్పుల్లో మనుషులు పిట్టల్లా చనిపోవడం ప్రకృతి వైపరీత్యంకాదా? ఈ విషయంలో ప్రభుత్వం చేయగలిగింది ఏమీలేదా? ఏ యుగంలో వున్నాం మనం!!

జలగ్రహం - భూగ్రహం

26 May 2013

1980 నాటి మాట. అనంతపురంలో వున్నాను. చిన్నప్పుడు నరసాపురంలో మేము రోజూ కాలవలో స్నానం చేసేవాళ్ళమంటే ఆ జిల్లా మిత్రుడు ఒకడు నమ్మలేదు. నిజంగా మనిషి మునిగి స్నానం చేసేంత నీళ్ళు కాలవలో వుంటాయా అని పదిసార్లు అడిగాడు. వాళ్లకూ పెన్నా నది వుంది. అయితే వాళ్ళు దాన్ని బొందల పెన్నా అంటారు. ఇసక మేటతప్ప అందులో నేను ఎప్పుడూ నీళ్ళు చూడలేదు.

మావూర్లో మూడు పిల్ల కాలువలు, ఒక మేజర్ కాలువ, ఒక గోదావరి నది, ఒక సముద్రం వుంటుందంటే నేను అతనికి ఒక జానపద కథ వినిపిస్తున్నాను అనుకున్నాడు. వరద కాలంలో మా వూరి రోడ్ల మీద పడవలు తిరిగేవి అంటే నా అనంతపురం మిత్రుడు చాలా అసహనానికి గురయ్యాడు.

ఇప్పుడు భయం ఏమిటంటే, మా నరసాపురంలోనూ నీళ్ళు అంతరించిపోతున్నాయి. భవిష్యత్తులో మా వూరి నీళ్ల గురించి చెపితే, మా వూరివాళ్ళే నమ్మరేమో!!

మన జలగ్రహం నిజంగానే భూగ్రహం అయిపోతుందా?

Danny Notes

19 May 2010

శ్రమ

స్వతంత్ర భారతదేశంలో తొలితరం శ్రమను ప్రేమించింది. దేశనిర్మాణంలో కీలకపాత్ర నిర్వహించింది. తాముపడినంత శ్రమను తమ సంతతి పడకూడదనీ కలలు కన్నది. ఆ కలల సత్ఫలితాల్ని కొన్నాళ్ళు మనం చూశాం. వాటి దుష్ఫలితాలని ఇప్పుడు చూస్తున్నాం. విద్యాధికులైన నేటి యువతరం శ్రమను అసహ్యించుకుంటున్నది. గతంలో మనకు గ్రామీణప్రాంతాల్లో భూమిలేని భూస్వాములు కనిపించేవారు. నేటి నగర యువతలో డబ్బులులేని కోటీశ్వరులు కనిపిస్తున్నారు. ఇలాంటి ధోరణి ఉత్పాదక రంగాన్ని దెబ్బతీస్తుంది.

Danny Notes

19 May 2010

సహాయం

బాల్యంలోనో, శిక్షణ పొందే దశలోనో మాత్రమే మనం ఇంకొకరి సహాయం తీసుకోవాలి. వృధ్ధాప్యంలో ఎలాగూ మళ్ళీ ఇంకొకరి సహాయం తీసుకోక తప్పదు. బాల్యానికి వృధ్ధాప్యానికి మధ్య మన బతుకు మనం బతకాలి. ఇంకొకరి జీవనానికీ సహాయకారులం కావాలి.

ఒక వ్యక్తి జీవితంలో బాల్యం, వృధ్ధాప్యం ఎంత చిన్నవిగావుంటే అంత మంచిది. వాటి మధ్య కాలం ఎంత పెద్దదిగావుంటే అంత మంచిది
విజయం- పతనం

Danny Notes, 5 May 2013

మనిషి మహత్తర విజయం సాధించడానికి ఒక్క మలుపు చాలు. మనిషి పతనాన్ని శాసించడానికి ఒక్క తప్పు చాలు.

సమాజం - న్యాయస్థానం 

Danny Notes, 5 May, 2013  

సమాజాన్ని యేలేవాళ్ళే సాధారణంగా న్యాయస్థానాల్నీ ఏలుతారు.

ఒకే సామాజికవర్గం

Danny Notes, 5 May, 2013  

మనం అంతగా గమనించంగానీ, ప్రపంచంలో ఎక్కడైనా, ఎప్పుడైనా ఘరానా దొంగలు, పెద్ద పోలీసు ఆఫీసర్లూ, పేరుమోసిన న్యాయవాదులూ, ప్రధాన రాజకీయపార్టీల నాయకులు, తీర్పు చెప్పే న్యాయమూర్తులూ అంతా ఒకే సామాజికవర్గానికి చెందివుంటారు.  లేకుంటే, ఒకే ఆర్ధికవర్గానికి చెందివుంటారు.

ఆడవాళ్ల భాష

Danny Notes, 5 May, 2013  

మగవారికన్నా మహిళలు నుడికారంతో మాట్లాడుతారు. ఏదైనా కొత్త భాషను  నేర్చుకోవాలనుకున్నప్పుడు, ఆడవాళ్ల మాటతీరును పరిశీలించడం మంచిది. 

అతివాదులు, మితవాదులూ ఒక్కటే

Danny Notes, 3 May, 2013

దేశభక్తి గురించి భారతీయ జనతా పార్టి అతిగా మాట్లాడుతుంది. భారత భూమిని, గనుల్ని ఘనపు అడుగుల చొప్పున తవ్వేసి, కోట్ల టన్నుల ఇనప ఖనిజాన్ని చైనాకు తరలించిన ’గనుల ఘనుడు’ గాలి జనార్దనరెడ్డి కమలనాధుడే!  దేశానికి ఈ స్థాయిలో ద్రోహం చేసినవాడూ సమీప గతంలో మరొకడులేడు!

అద్వానీయో, వెంకయ్యనాయుడో "ఇప్పుడు గనుల ఘనులు మాతోలేరు", "కర్ణాటక బీజేపి పునీత మయింది" అంటే జనం నమ్ముతారా?

గాలి జనార్దన రెడ్డిని సిబిఐ అరెస్టు చేసిన తరువాత బీజేపి దూరంగా పెట్టిందా? అతని దేశద్రోహాన్ని ముందే కనిపెట్టి పక్కన పెట్టిందా? ఈ ప్రశ్న ఎప్పుడూ సజీవంగానే వుంటుంది. 

కాంగీయులు కూడా భారీ స్కాములు నడిపారు.  గాలి జనార్దన రెడ్డి ఇంకో అడుగు ముందుకేసి  శత్రుదేశానికి సహకరించాడు!  నేరం చేస్తున్నపుడు అతను కర్ణాటకలో బీజేపి మంత్రి! 

విలాసవంతమైన పాత్రికేయ జీవితం

Mayday,2013,  Danny Notes

విలాసవంతమైన పాత్రికేయ జీవితంలో దొరకనిది సమయం ఒక్కటే!!

ఈరోజు ఉదయం నాలుగు గంటలకు లేచాను. మా హైస్కూలు పూర్వ విద్యార్ధుల సమావేశాలు ఈ నెల 10,11 న నర్సాపురంలో జరుగుతున్నాయి. ఆ సందర్భంగా తెచ్చే సావనీర్ కు ఒక ఆర్టికల్ కావాలని మా అమ్మనమంచి కృష్ణశాస్త్రి ఈ-మేయిల్. కృష్ణశాస్త్రి మాటంటే అదో శాసనం. నేను చాలాసార్లు శాసనోల్లంఘనం చేశానుగానీ, కృష్ణశాస్త్రి ఆదేశాల్ని మాత్రం ఉల్లంఘించలేకపోయాను.

అలనాటి నా సహాధ్యాయుల్ని తలుచుకుని ఒక ఆర్టికల్ రాయడం మొదలెట్టా. దాన్ని పూర్తి  చేయక ముందే, ఇంగ్లీష్ అండ్ ఫారిన్ లాంగ్వేజెస్ యూనివర్శిటీ నుండి అసిస్టెంట్ ప్రొఫెసర్ పంతుకుల శ్రీనివాస్ వచ్చాడు. పక్షం రోజులుగా అడుగుతుంటే అతనికి ఈ రోజు అప్పాయింట్ మెంట్ ఇచ్చాను. నన్ను ఇంటర్వ్యూ  చేయడానికి నలభై ప్రశ్నలతో వచ్చాడతను. అతనికి సమాధానాలు ఇస్తున్నపుడే, మా గురువుగారు వాసిరెడ్డి వేంకట కృష్ణారావుగారు ఫోన్ చేశారు.   వారి ఫోన్ లో ఒబామా నుండి ప్రచండ వరకు చాలా విషయాలుంటాయి. ఆర్టికల్, ఫోన్, ఇంటర్వ్యూ!!!  త్రిపాత్రాభినయం!! మధ్యాహ్నం పన్నెండు అయింది, అప్పటి వరకు నో బ్రేక్ ఫాస్ట్.  పంతుకుల శ్రీనివాస్ ను పంపించి, శాస్త్రికి ఈ-మెయిల్ పంపితే, టీచర్స్ మీద ఇంకో ఆర్టికల్ పంపాలని ఇంకో ఫర్మానా!! అదీ పూర్తి చేసే సమయానికి రెండు దాటింది. శెలవురోజైనా టీవీలకు శెలవు వుండదు కదా. మళ్ళీ మా ఆవిడతో కలిసి  ఆఫీసు, అక్కడ రోజువారీ స్క్రిప్టు, ఆ తరువాత రాత్రి ఎనిమిది గంటలకు పర్చేజింగులు. సో ఆన్!!!

మే డే ! ఇప్పుడు మనమున్న పరిస్థితికన్నా, చికాగో పోరాటానికి ముందు రోజులే బాగుండేవేమో!