Viswaroopam - Notes

NOTES ON VISWAROOPAM

విశ్వరూపం  -1

సాంకేతికంగా అద్భుతమైన, నటనపరంగా ఉన్నతమైన,  విస్తృతిలో అంతర్జాతీయమైన, సన్నివేశాలపరంగ అర్ధసత్యమైన, సమర్పించడంలో అతితెలివైన, సారాంశంలో అమెరికా అనుకూలమైన సినిమా.

విశ్వరూపం  -2

కమల్‌హసన్ భారతీయ సినిమాను  సాంకేతికంగా అంతర్జాతీయస్థాయికి తీసుకెళ్ళారు అనడంలో ఎలాంటి సందేహంలేదు. సాంస్కృతికంగా అమెరికా స్థాయికి తీసుకువెళ్ళారు అనంటే ఇంకా సమంజసంగా ఉంటుంది.

విశ్వరూపం  -3

కథాస్థలం ఆఫ్ఘనిస్తాన్ కాకుండా ఇరాక్ అయితే కథ ఎలా నడిచేది? అనే ఒక చిన్న సందేహం ఏఒక్కరికి కలిగినా, విశ్వరూపం నిర్మాతలు ఆశించే అంతర్జాతీయ ప్రయోజనాలు అర్ధం అవుతాయి.

విశ్వరూపం  -4

కళనుకళగానే చూడాలనేది పాలకవర్గాల భావజాలం. కళను సామాజికంగానే చూడాలనేది పాలితుల చారిత్రక అవసరం.

విశ్వరూపం  -5

కళాకారుడు కళాకారుడిగానే వుంటే ఎవరీకీ అభ్యంతరం వుండదు. తెలిసిగానీ, తెలియకగానీ రాజకీయాల్లోకి అడుగుపెడితే, ఆ తరువాత రాజకీయాలే వుంటాయి.

విశ్వరూపం  -6

అమెరికా ప్రాయోజిత కార్యక్రమంగా అంతర్జాతీయ వేదికలపై సాగుతున్న ముస్లిం వ్యతిరేక ప్రచారానికి అనువుగా ఈ సినిమా వుంది. అయితే, ఇందులో ఎక్కడా హిందూ -ముస్లిం విబేధాల ప్రస్తావన లేదు. నేరుగా, ఈ సినిమావల్ల భారతదేశంలో మతఘర్షణలు చెలరేగే అవకాశాలు అస్సలు లేవు. ఈ సినిమాను ముస్లింలు నిరసిస్తే సరిపోతుంది.  నిషేధించాల్సిన అవసరం అస్సలు లేదు.

విశ్వరూపం  -7

ఎప్పుడైనాసరే, కళాసాహిత్యాల నిషేధం అనేది కోరదగ్గ అంశంకాదు. సాంస్కృతిక దాడిని సాంస్కృతిక దాడితోనే ఎదుర్కోవాలి.