Manu Smriti -Fascism - Manu Smriti

Manu Smriti -Fascism - Manu Smriti 

మనుస్మృతి – ఫాసిజం – మనుస్మృతి

-        

      డానీ 

ఫాసిజాన్నీ, నాజిజాన్నీ అధ్యయనం చేయాల్సిన అవసరం గతంలోకన్నా ఇప్పుడు ఎక్కువగా ముందుకు వచ్చింది. చాలామంది లైబ్రరీల మీద పడి అలనాటి ఇటలీ, జర్మనీ రాజకీయార్ధిక పరిణామాల్నీ, అప్పటి తత్వవేత్తల పుస్తకాలనీ తెగ చదివేస్తున్నారు. నిజానికి భారతీయులు అంత దూరం వెళ్ళాల్సిన అవసరంలేదు. మన ‘మనుస్మృతి’యే ‘చండాలుడు’ (Tschandala) సిధ్ధాంతంతో సహా జర్మనీకి చేరి  ప్రైడరిక్ నీషేను ప్రభావితం చేసి  ఆ తరువాత అతని సోదరి ఎలిజబెత్ ఫోర్ స్టర్ నీషే ద్వార హిట్లర్ కు చేరి  ఆ నియంతకు కొత్త ఉత్తేజాన్ని ఇచ్చింది. నీషే రచనల సమగ్ర సంకలనాన్ని మరో నియంత బెనిటో ముస్సోలినికి పుట్టిన రోజు కానుకగా ఇచ్చాడు హిట్లర్.  ఆర్య సంస్కృతి, సమానత్వ సిధ్ధాంత నిరాకరణలతోపాటూ స్వస్తిక్ చిహ్నం సహితం జర్మన్ క్రైస్తవ మతవర్గతత్త్వ నియంతకు గొప్పగా నచ్చేశాయి.

ఇప్పటి మన కేంద్ర ప్రభుత్వ పోకడల్ని గమనిస్తే వారికి కూడ మనుస్మృతి ఆదర్శంగా మారుతున్నట్టు సులువుగానే అర్థం అవుతోంది. మన రాజ్యాంగపు ప్రవేశికలో “సర్వసత్తాక సామ్యవాద, లౌకికవాద, ప్రజాస్వామికవాద రిపబ్లిక్” అనే ఆకాంక్ష ప్రకటనను “సర్వసత్తాక మనువాద రిపబ్లిక్” గా మార్చేందుకు పావులు కదులుతున్నట్టుగా కూడ  బోధపడుతుంది. న్యాయం, స్వేఛ్ఛా, సమానత్వం, సౌభ్రాతృత్వాలకు ముప్పు రాబోతున్నదని గ్రహించకపోతే మన జ్ఞాన వ్యవస్థ పనిచేయడం మానేసిందని  అనుకోవచ్చు. 

ప్రజాస్వామం అంటే అధికసంఖ్యాకులు ఆధిపత్యాన్ని చెలాయించడం కాదు, అల్పసంఖ్యాకుల మనోభావాల్ని సహితం గౌరవించాలని అర్థం. పాలనాధికారం మొత్తం ఒకే విభాగంలో కేంద్రీకరించేస్తే నియంతృత్వ పోకడలు పొడచూపుతాయని ప్రజాస్వామిక సిధ్ధాంతకర్తలు ముందుగానే ఊహించారు. అందుకే పాలనాధికారాన్ని న్యాయ, చట్టనిర్మాణ, కార్యనిర్వాహక వ్యవస్థలకు సమానంగా పంచారు.  కొన్ని దేశాల్లో మీడియా, కార్మిక సంఘాలు, పౌరసమాజాన్ని కూడ ప్రజాస్వామ్య భవనానికి మూల స్థంభాలుగా భావిస్తారు.

ప్రజాస్వామిక సిధ్ధాంతకర్తలు భయపడ్డట్టే కొన్ని చారిత్రక దశల్లో కొన్ని దేశాల్లో ప్రభుత్వం, కార్పొరేట్లు ఏకం అయిపోయారు. నరేంద్ర మోదీజీ గుజరాత్ ముఖ్యమంత్రిగా వుండగా జరిగింది అదే. నరేంద్ర మోదీజీని ప్రధానిని చేసిన భారత కార్పొరేట్లు ‘గుజరాత్ ఫార్మూలా’ను దేశానికి వర్తింపచేసి మరింత లాభాలు దండుకునే ప్రయత్నంలో వున్నాయి. ప్రభుత్వమే తమ గుప్పిట్లో వున్నప్పుడు న్యాయ, చట్టనిర్మాణ, కార్యనిర్వాహక వ్యవస్థలను సహితం కార్పొరేట్లు తమ గుప్పిట్లో పెట్టుకున్నట్టే.

ప్రభుత్వ విధుల్ని న్యాయ, చట్టనిర్మాణ, కార్యనిర్వాహకవర్గ వ్యవస్థలకు పంచితే అది ప్రజాస్వామ్యం. ప్రభుత్వం కార్పొరేట్లు కలిసిపోతే అది ఫాసిజం. ఇటలీలో ఫాసిజానికి ఆద్యుడు అయిన బెనిటో ముస్సోలిని ఈ సత్యాన్ని చాలా గర్వంగానూ చెప్పుకున్నాడు. “ఫాసిజానికి సరైన అర్థం ఏమంటే రాజ్యాన్ని కార్పొరేట్ గా మార్చడం. ఎందుకంటే ఇది రాజ్యాన్నీ, కార్పొరేట్ శక్తినీ  విలీనం చేస్తుంది” అన్నాడు. “Fascism should more appropriately be called Corporatism because it is a merger of state and corporate power”

రాజ్యాన్ని కార్పొరేట్ గా మార్చే ప్రక్రియా ప్రధానంగా ఆర్థిక పరమైనది. వివరంగా చెప్పాలంటే, సంపదను సృష్టించే  భూమి, అడవులు, ఖనిజాలు, కొండలు, లోయలు, నదులు, సముద్రాలు తదితర సహజ వనరులన్నింటినీ  కార్పొరేట్ల పరం చేయడం. అయితే, దేశ జనాభాలో అత్యధికులుగా వుండే  సామాన్య ప్రజలు తీవ్ర ఆర్థిక అసమానత్వాన్ని అంతకన్నా తీవ్రంగా వ్యతిరేకిస్తారు. పోలీసులు, లాఠీలు, తుపాకులు, జైళ్ళు, ఉరికొయ్యలతో వాళ్ళ నోళ్ళను నొక్కే ప్రయత్నం ప్రభుత్వం చేయవచ్చు. అశాంతిని అదుపు చేయడానికి సైన్యాన్ని కూడ రంగంలోనికి దించవచ్చు. అయితే, అది సత్ఫలితాలను ఇస్తుందన్న నమ్మకంలేదు. ప్రజలు తెగబడి పోరాటాలకు సిధ్ధపడితే అంతర్యుధ్ధం చెలరేగవచ్చు. ఇలాంటి ప్రమాదం నుండి తప్పించుకోవడానికి ప్రజల్లో చీలికలు తేవడం ఒక అవసరంగా కార్పొరేట్ రాజ్యం  గుర్తిస్తుంది.

ప్రజల్లో చీలికలు తేవడానికి కార్పొరేట్ రాజ్యానికి అనేకానేక అస్థిత్వాలు అందుబాటులో వుంటాయి. వీటన్నింటిలోనూ పదునైన, బలమైన ఆయుధం మతం. అయితే, మతాన్ని నేరుగా రాజకీయాల్లోనికి తేవడం విద్యాధికులైన మధ్యతరగతికి అంతగా రుచించదు. కార్పొరేట్లు బలపడితేనే దేశం శక్తివంతం అవుతుందని వాళ్ళను నమ్మించగలిగితే మతం దేశభక్తి కలగలిసి ఒక్క రూపాయి ఖర్చు కూడ లేకుండా ఒక బలమైన అసంఖ్యాక స్వఛ్ఛంద సాంస్కృతిక సైన్యం ప్రభుత్వానికి అనుకూలంగా ఏర్పడుతుంది. ప్రభుత్వానికీ, కార్పొరేట్లకూ అనుకూలంగా స్థాయీ సైన్యం సహితం చేయలేని అనేక పనుల్ని ఈ సాంస్కృతిక సైన్యం సునాయాసంగా  చేసి పడేస్తుంది. ఇటలీలో ముస్సోలిని ‘బ్లాక్ షర్ట్స్’ పేరుతో ఫాసిస్టు మూకల్ని సృష్టిస్తే, జర్మనీలో అడాల్ఫ్  హిట్లర్ ‘షుట్జ్ స్టాఫెల్’ (ఎస్‍ ఎస్) పేరుతో నాజీ మూకల్ని సృష్టించాడు.

కార్పొరేట్ సంస్థలకు లాభాలే ముఖ్యం. ఏ విదేశీ సంస్థతో అయినా సరే అవి ఎప్పుడయినా కలిసిపోతాయి. లాభాలు ఎక్కువగా వస్తే తమ సంస్థల్ని పూర్తిగా అమ్మేసుకుంటాయి. అలాంటప్పుడు కార్పొరేట్ దేశభక్తి వంటి భావనల్ని బయటి నుండి చొప్పించడం సాధ్యమేనా? ప్రభుత్వం చెపితే ప్రజలు నమ్మేస్తారా? మనుషుల విచక్షణా జ్ఞానం సంగతేంటీ? వంటి సందేహాలూ ఈ సందర్భంగా తలెత్తుతాయి. వీటికి సమాధానాలు ఇవ్వడానికి ముందు మనిషి స్వభావాన్ని అర్థం చేసుకోవాల్సి వుంటుంది.

“మనిషి స్వభావసిధ్ధంగా వున్నతుడు అని ఎవరైనా అన్నప్పుడు వాళ్ళు ఒక గొప్ప విషయాన్ని చెపుతున్నట్టు మనమంతా నమ్ముతాము. కానీ, మనిషి స్వభావసిధ్ధంగానే చెడ్డవాడు అని ఎవరైనా అంటే వాళ్ళు అంతకన్నా మహత్తర విషయాన్ని చెపుతున్నారని మాత్రం మనం మరిచిపోతాం” అన్నాడు జర్మన్ తత్వవేత్త జోర్జ్ విల్హెమ్ ఫ్రైడ్రిక్  హెగెల్.

ప్రకృతిలో ఏ జీవితో పోల్చినా అతి క్రూరమైన జీవి మనిషి. తనను సృష్టించిన ప్రకృతినే కబళించాలనుకునే కృతఘ్నుడు. ఒక రోజు తాను సహితం నాశనం అయిపోతానని తెలిసినా ప్రకృతి విధ్వంసాన్ని ఆపని స్వార్ధపరుడు. తల్లిదండ్రులో, సోదరులో చనిపోతే వాళ్ల ఆస్తి తనకు సంక్రమిస్తుందని ఎదురుచూసే అత్యాశ పరుడు మనిషి. వ్యక్తిగత ఆస్థి మీద ఆత్యాశ అతిశయించినపుడు జన్మనిచ్చిన తల్లిదండ్రుల్ని సహితం చంపడానికి వెనుకాడని భూతం మనిషి. సంచలనాత్మక హత్యల్ని చేయిస్తున్నది ఆకలితో అలమటిస్తున్న నిరుపేదలు కాదు; వేల కోట్ల రూపాయల రాజప్రసాదాల్లో నివశిస్తున్న శ్రీమంతులు. వీటి అర్ధం ఏమంటే ఈ భూమ్మీద అత్యంత ప్రమాదకర జీవి మనిషి. మనిషి మాంసం రుచి మరిగిన పులిని అడవినంతా గాలించి చంపేస్తారు ఆటవికులు. వ్యక్తిగత ఆస్థి రుచి మరిగిన మనిషి తమ మధ్య సంచరిస్తున్నా మౌన ప్రేక్షకుల్లా వుండిపోతారు నాగరీకులు.

యాధృఛికంగా సోదరులు చనిపోతే కొందరికి ఆస్తి కలిసి రావచ్చు.  కానీ, ఆస్తి కోసం సోదరుల్ని చంపేస్తే అది రక్తపు కూడు అవుతుంది. ఇంతటి కౄరత్వానికి ఒక సాంస్కృతిక జాతీయవాద ముసుగు కప్పి దానికి ఆమోదాంశాన్ని సాధించడం ద్వార చరిత్రలో మతవర్గ నియంతృత్వం ప్రవేశిస్తుంది. మనుషుల్లో దాగివున్న భూతం బిరడాను తీసి ప్రజల్లో ఒక సాంస్కృతిక ఉన్మాదాన్ని రేకెత్తించి తన రాజకీయార్ధిక అవసరాలకు వాడుకోవడం కార్పొరేట్ రాజ్యానికి బాగా తెలుసు. “ఆస్తి కోసం మీరు మరొకర్ని చంపి హంతకులు కావల్సిన పనిలేదు. మీకోసం నేను ఇతరుల్ని చంపి మీ సంపదను పెంచుతాను” అనే సంకేతాలను అది చాలా బలంగా ప్రసారం చేస్తుంది.

ముస్సోలినీ, హిట్లర్ లకు మొగమాటం లేదు కనుక ఈ విషయాన్ని వాళ్ళు చాలా బాహాటంగానే చెప్పుకున్నారు. ఆఫ్రికా ఖండాన్ని ఖాళీ చేయించి, (అంటే, స్థానికుల్ని చంపేసి) అక్కడ కోటి మంది ఇటాలియన్లకు స్థిర నివాసం ఏర్పాటు చేస్తే  ఇటలీ ప్రజలు ఛాతీ నిండా ఊపిరి పీల్చుకోవచ్చు అన్నాడు ముస్సోలిని. రష్యాను ఆక్రమించుకుని అక్కడి యూదు రైతుల్ని బానిసలుగా మార్చుకుంటే జర్మన్లకు కావాలసినంత ఆహారాన్ని వాళ్ళు పండించి పెడతారు  అన్నాడు హిట్లర్.

మన దేశాధినేతలకు ‘మొగమాటం’ ఎక్కువ వాళ్ళు అలాంటి ప్రకటనలు చేయరు గానీ అలాంటి ఆ పనులు మాత్రం చేస్తారు. ఈశాన్య రాష్ట్రాల ప్రజల మనోభావాలను వింటే మనకు ఆ విషయాలు మరింత స్పష్టంగా అర్థం అవుతాయి. దీనికి సరికొత్త ఉదాహరణ కశ్మీర్. కశ్మీర్ గురించి ఇప్పుడు ప్రపంచం అంతా మాట్లాడుతోంది. కశ్మీరీలు ఏ మాట్లాడుతున్నారో మాత్రం ప్రపంచానికి ఇప్పటికీ తెలియడంలేదు.

కశ్మీర్ కు ప్రత్యేక హక్కులను ఇచ్చే అధీకరణం 370ను పార్లమెంటు ఆగస్టు 6న రద్దు చేసింది. ఆరు రోజుల్లోనే రిలయన్స్ అధినేత ముఖేష్ అంబాని కశ్మీర్ లో భారీ పెట్టుబడులు పెడుతున్నట్టు ప్రకటించారు. భారత పార్లమెంటు ఆర్టికల్ 370ని రద్దు చేయడం మూలంగా రిలయన్స్ సంస్థ కశ్మీర్ లో పెట్టుబడులు పెడుతున్నదా? లేక రిలయన్స్ సంస్థ కశ్మీర్ లో పెట్టుబడులు పెట్టదలిచింది గాబట్టి భారత పార్లమెంటు ఆర్టికల్ 370ని రద్దు చేసిందా? అనేది ఎవరికయినా రావలసిన సందేహమే! ప్రత్యేక హక్కుల రద్దు క్రమం కాశ్మీర్ తో  ఆగదు. ఈ క్రమం లక్ష్యం ప్రజాస్వామిక రాజ్యాంగం రద్దు!    

(రచయిత సీనియర్ జర్నలిస్టు, సమాజ విశ్లేషకులు)

మొబైల్ 9010757776

రచన :  30 ఆగస్టు 2019

ప్రచురణ : ప్రజాపాలన, 21 సెప్టెంబరు 2019

Minorities' View on the Withdrawal of Telangana Armed struggle

Minorities' View on the Withdrawal of Telangana Armed struggle

మెజారిటీవర్గం తిడితే విప్లవం!.

మైనారిటీవర్గం విమర్శిస్తే  మతతత్వం!!.

1.            సోషలిస్టు విప్లవం (ఫ్యాక్టరీ) కార్మికవర్గం నాయకత్వంలో సాగుతుందనే భావన ప్రపంచ వ్యాప్తంగా 1940వ దశాబ్దం వరకు బలంగా వుండేది. వ్యవసాయిక దేశమైన చైనాలో అక్కడి కమ్యూనిస్టు పార్టి 1946లో రైతు-కూలీల నాయకత్వంలో నూతన ప్ర‌జాస్వామిక విప్లవ పంథాను చేపట్టిది. మావో పంథా భారత కమ్యూనిస్టు పార్టికి  ప్రేరణ ఇచ్చింది.  

2.            భారత దేశానికి 1947 ఆగస్టు 15న స్వాతంత్ర్యం వచ్చింది. అయితే, అది కేవలం అధికార మార్పిడి మాత్రమేనని, ప్రజలకు స్వాతంత్ర్యం రాలేదని  భారత కమ్యూనిస్టు పార్టి అంచనా వేసింది.

3.            ఆరు నెలల తరువాత, 1948 ఫిబ్రవరి 28 నుండి వారం రోజుల  పాటు కలకత్తాలో  జరిగిన భారత కమ్యూనిస్టు పార్టి రెండవ మహాసభల్లో కొత్త ప్రధాన కార్యదర్శిగా బిటి రణదివే  ఎన్నికయ్యారు.

4.            బూటకపు స్వాతంత్ర్యాన్ని ఎదుర్కోవడానికి దేశవ్యాప్తంగా సాయుధ పోరాట పంథాను చేపట్టాలనేది రెండవ కాంగ్రెస్ చేసిన చారిత్రాత్మక నిర్ణయం. We must continue our struggle against the bourgeoisie. Strikes, mass rallies, demonstrations, and armed struggles must be used to challenge this false sense of freedom అని ఆ తీర్మానంలో పేర్కొన్నారు.  

5.            భారత కమ్యూనిస్టు పార్టి సాయుధ పోరాట పంథాను స్వీకరించడంతో పున్నప్ర-వాయలార్, తెభాగ, త్రిపుర వంటి కొన్ని ప్రాంతాల్లో కొన్ని అలజడులు సాగినప్పటికీ సిసలయిన సాయుధ పోరాటం సాగింది మాత్రం తెలంగాణలోనే.

6.            1951 ఫిబ్రవరి ఆరంభంలో కమ్యూనిస్టు పార్టి జాతీయ నాయకులయిన చండ్ర రాజేశ్వరరావు, శ్రీపాద అమృత డాంగే, అజయ్ ఘోష్, మాకినేని బసవ పున్నయ్య సాయుధ పోరాట పంథా మీద అంతర్జాతీయ కమ్యూనిస్టు సమితి సలహా కోసం సోవియట్ రష్యా వెళ్ళారు.

7.            వాళ్ళు అక్కడ  1951 ఫిబ్రవరి 9న స్టాలిన్ ను కలుసుకున్నారు. భారత దేశంలో సాయుధ పోరాటాన్ని విరమించాలని స్టాలిన్ వారికి సూచించాడు. అలా సూచించడానికి నెహ్రూతో స్టాలిన్ అవసరాలు స్టాలిన్ కు వున్నాయి.

8.            రష్యాలో స్టాలిన్ ను కలిసివచ్చిన కమ్యూనిస్టు ప్రతినిధివర్గం 1951 అక్టోబరు చివర్లో ఫైజ్ పూర్ లో  పార్టీ మూడవ కాంగ్రెస్ ను నిర్వహించారు. సాయుధ పోరాట పంథాను చేపట్టిన బిటి రణదివేను ‘వామపక్ష అతివాద దుందుడుకువాదిగా’ విమర్శించి జాతీయ ప్రధాన కార్యదర్శి పదవి నుండేగాక జాతీయ సమితి నుండి కూడ తొలగించారు. 

9.            ఆ మహాసభలోనే సాయుధ పోరాట పంథాను విరమించి పార్లమెంటరి పంథాను చేపట్టాలని 1951 అక్టోబరు 21న  తీర్మానం చేశారు.

10.       సాయుధ పోరాట పంథాను చేపట్టాలని భారత కమ్యూనిస్టు పార్టి రెండవ కాంగ్రెస్ చేసిన తీర్మానికీ, సాయుధ పోరాట పంథాను వదిలి పార్లమెంటరీ పంథాను చేపట్టాలని భారత కమ్యూనిస్టు పార్టి మూడవ  కాంగ్రెస్ చేసిన తీర్మానానికీ తెలంగాణలో సాగిన రైతాంగ సాయుధ పోరాటానికీ సంబంధం లేదు. దాని తేదీలు దానివే. దీని తేదీలు దీనివే.

11.       సాయుధ పోరాట పంథాను చేపట్టాలని భారత కమ్యూనిస్టు పార్టి రెండవ కాంగ్రెస్ తీర్మానం చేయడానికి ఏడాదిన్నర ముందే తెలంగాణ రాష్ట్ర కమిటి సాయుధ పోరాట పంథాను చేపట్టింది. అలాగే సాయుధ పోరాటాన్ని విరమించాలని భారత కమ్యూనిస్టు పార్టి మూడవ కాంగ్రెస్ తీర్మానం చేయడానికి రెండున్నరేళ్ళు ముందే తెలంగాణ రాష్ట్ర అగ్రనేతలు సాయుధ పోరాటాన్ని విరమించారు. పోరాటం ఆరంభానికీ, విరమణకు కారకులు తెలంగాణ రాష్ట్ర కమిటి అగ్ర నాయకులు రావి నారాయణ రెడ్డి.

12.        తెలంగాణ సాయుధ రైతాంగ పోరాటానికి థింక్ ట్యాంక్ గా పనిచేసిన  కామ్రేడ్స్ అసోసియేషన్ లో దేవులపల్లి వెంకటేశ్వరరావు వంటి ఒకళ్ళిద్దరుతప్ప మిగతా మేధావులు, కవులు, తత్వవేత్తలు అందరూ ముస్లింలు.

13.    దొడ్డి కొమరయ్య మరణంతో తెలంగాణలో సాయుధ పోరాటాన్ని చేపడుతున్నట్లు 1946 జులై 4న రావి నారాయణరెడ్డి, బద్దం ఎల్లారెడ్డి, మగ్ధూమ్ మొహియుద్దీన్  ప్రకటించారు.

14.       ఇండియన్ యూనియన్ చేపట్టిన పోలీస్ యాక్షన్ తో 1948 సెప్టెంబరు 17/ 18 తేదీల్లో నిజాం సంస్థానం భారత్ లో విలీనం అయ్యింది.  

15.   నెహ్రూ మార్కు సోషలిజం మీద విశ్వాసం,  భ్రమలు గలిగిన మితవాద వర్గం కూడా తెలంగాణ రాష్ట్ర కమిటీలో బలంగా వుండింది. నెహ్రూ ప్రేమికులైన మితవాద వర్గానికి నాయకుడు రావి నారాయణ రెడ్డి.

16. తెలంగాణలో రైతుకూలీ (సోషలిస్టు) రాజ్యం నినాదంతో ఆ పోరాటం మొదలయింది. నిజాం సంస్థానం విలీనం కాగానే రావి నారాయణ రెడ్డి పోరాట విరమణ ప్రకటన చేశారు.

17.  ప్రజలు సామ్యవాదాన్ని కాకుండ ప్రజాస్వామ్యాన్ని కోరుకుంటున్నారు అనే వాదాన్ని రావి నారాయణ రెడ్డి ముందుకు తెచ్చారు. వారి ఫార్మూలాను అప్పుడూ ఆ తరువాతి కాలంలోనూ కొందరు గట్టిగానే వ్యతిరేకించారు. అయితే, రెండున్నరేళ్ళ తరువాత కమ్యూనిస్టు పార్టి  జాతీయ కమిటి సహితం రావి నారాయణ రెడ్డి  ఫార్మూలానే అధికారిక పంథాగా స్వీకరించింది.   

18. 1948 నుండి 1951 వరకు కొందరు కొనసాగించిన సాయుధ పోరాటం ఒక అనధికార చర్యగా మిగిలిపోయింది.   

19.   తెలంగాణ పోరాటంలో -  పోలీసు చర్యకు ముందు - తొలి అమరుడు షేక్ బందగీ, చివరి అమరుడు షోయబుల్లా ఖాన్. రావి నారాయణ రెడ్డి ప్రకటనవల్ల కమ్యూనిస్టు పార్టీని నమ్ముకున్న ముస్లింలు తీవ్రంగా నష్టపోయారు.

20.       తెలంగాణ సాయుధపోరాట ఫలితాల్లో బందగీ, షోయబుల్లాల స్వీయ సామాజిక వర్గాలకు దక్కింది ఏమిటీ?

21.       చాకలి ఐలమ్మ స్వీయ సామాజిక వర్గాలైన వెనుకబడిన తరగతులకు  దక్కింది ఏమిటీ?

22.       విలీనం , సాయుధపోరాట విరమణల అనంతరం ఆంధ్రా ప్రాంతంలో అయినా తెలంగాణలో అయినా మళ్ళీమళ్ళీ సంపదను పెంచుకున్నది సాంప్రదాయ వ్యవసాయ సామాజికవర్గాలే కదా?

23.      హైదరాబాద్ స్టేట్ గా మారిన నైజాంలో 1952లో జరిగిన ఎన్నికల్లో కమ్యూనిస్టులు పిడిఎఫ్ పేరుతో పోటీ చేశారు.

24.       పిడిఎఫ్ కూటమికి నాయకత్వం వహించిన డాక్టర్ జయసూర్య పోలీస్ యాక్షన్ సందర్భంగా జరిగిన ప్రాణ నష్టం గురించి కేంద్ర హోంశాఖకు ఒక సమగ్ర రిపోర్టు సమర్పించారు.

25.    నిజాం సంస్థానంలో కనీసంగా 40 వేల మంది నుండి గరిష్టంగా రెండు లక్షల మంది వరకు ముస్లింలను భారత సైన్యం చంపేసిందని  డాక్టర్ జయసూర్య తన నివేదికలో పేర్కొన్నారు.

26. ఆ నివేదికలోని ఆరోపణల్ని పరిశీలించడానికి  ప్రధాని నెహ్రు తన సన్నిహితుడయిన సుందర్ లాల్ ను హైదరాబాద్ స్టేట్ కు పంపించాడు.

27.       సుందర్ లాల్ కమిటీ కూడా డాక్టర్ జయసూర్య నివేదికను బలపర్చింది.

28.  భారత కమ్యూనిస్టు పార్టి తెలంగాణ రాష్ట్ర కమిటీలో రావి నారాయణ రెడ్డికి వ్యతిరేకవర్గం కూడ బలంగా వుంది. పోరాట విరమణ నిర్ణయాన్ని దేవులపల్లి వేంకటేశ్వర రావు వంటివారు తీవ్రంగా విభేదించారు.

29.       వాళ్ళు రావి నారాయణ రెడ్డితో విబేధించి పోరాటాన్ని కొనసాగించాలన్నారు.

30.       ప్రజలు కూడ సాయుధ పోరాటాన్ని కోరుకున్నారు.

31.       ప్రజలు వేరు, కమ్యూనిస్టు పార్టి వేరు.

32.  రాష్ట్ర కమిటీలో అగ్రనేతలే నిరాసక్తంగా వుండిపోవడంతో ఆ పోరాటం ఆ తరువాత పూర్వపు వుధృతిని కోల్పోయింది.

33.       ఒక లాంఛనంగా మాత్రమే 1951 వరకు సాయుధ పోరాటం కొనసాగింది.

34.  నిజాం సంస్థానం విలీనం కాగానే తెలంగాణ కమ్యూనిస్టు అగ్రనేత రావి నారాయణ రెడ్డి పోరాట విరమణ ప్రకటన చేయడానికి దారి తీసిన సాంఘీక  కారణాలను  అన్వేషించడం ఇప్పుడు సామాజిక బాధ్యత.    

35.       ఆనాడు ఆర్యసమాజ్ రూపంలోవున్న సంఘపరివారం, కాంగ్రెస్ రూపంలోవున్న స్వామి రామానంద తీర్థల ఎజెండాలు కమ్యూనిస్టు పార్టి రూపంలోవున్న రావి నారాయణ రెడ్డి ఎజెండా ఒక్కటేనా?

36.   భారత కమ్యూనిస్టు పార్టి సాయుధ పోరాట పంథా అమలుకు అసలు నిజాం సంస్థానాన్నే ప్రధాన కార్యక్షేత్రంగా ఎందుకు ఎంచుకుందీ?

37.   అందులోనూ ఆంధ్రా ప్రాంతానికి ఆనుకుని వున్న నల్గొండ, వరంగల్ వంటి రెండు తెలంగాణ జిల్లాలలో మాత్రమే  సాయుధ పోరాటాన్ని ఎందుకు సాగించిందీ?

38.   ఈ సాయుధ పోరాటాన్ని తెలంగాణ ప్రజల విముక్తి కోసం సాగించిందా? లేక నిజాం సంస్థానంలో ఆంధ్రా వ్యవసాయ సామాజికవర్గాల ప్రవేశం కోసం సాగించిందా?

39.       తెలంగాణ రైతాంగ సాయుధ పోరాటంవల్లగానీ, పోరాట విరమణవల్లగానీ ఎస్టీ, ఎస్సీ, బీసి, మైనారిటీ సామాజికవర్గాలకు కలిగిన ప్రయోజనం ఏమిటీ?

40. సాంఘీకంగా అణగారిన సమూహాలకు ఈ పోరాటం వలన కలిగిన ప్రయోజనాలను పుచ్చలపల్లి సుందరయ్యగారు గానీ, దేవులపల్లి వేంకటేశ్వర రావుగారు గానీ తమ పరిశోధన గ్రంధాల్లో రాశారా?

41. ప్రాణప్రదమైన ఈ అంశాల్ని వారు రాయకపోతే ఆ పుస్తకాలను ఈతరపు అణగారిన సమూహాలు ఎందుకు చదవాలీ?

42.       కమ్యూనిస్టు సీనియర్లు ఇటీవల చేస్తున్న కామెంట్లను బట్టి ఇప్పుడు మరికొన్ని కొత్త అనుమానాలు కలుగుతున్నాయి. 

43.   సిపిఐను 1964లో ‘రివిజనిస్టు’ అని సిపిఐ (యం) నాయకులు విమర్శించింది నిజం కాదా?

44.   1969 తరువాత సిపిఐ (యం)ను ‘నయా రివిజనిస్టు’ అని సిపిఐ (మార్క్సిస్టు లెనినిస్టు), యూసిసిఆర్ ఐ (మార్క్సిస్టు లెనినిస్టు) విమర్శించింది నిజంకాదా?

45.  1948లో తెలంగాణలో సిపిఐ అనుసరించిన విధానాలను తప్పుపడుతుంటే  మార్క్సిస్టు లెనినిస్టులుగా చెలామణీ అవుతున్నవారు సహితం ఇబ్బంది పడుతున్నారు.  

46.       1970 లలో భారత శ్రామిక ఉద్యమానికి సిపిఐ ద్రోహం అనే పేరుతో ఒక విమర్శన డాక్యుమెంట్ రాలేదా?

47.    మెజారిటీవర్గం తిడితే విప్లవం!. మైనారిటీవర్గం విమర్శిస్తే  మతతత్వం!!. ఇదేమీ న్యాయం కామ్రేడ్స్? 

48.  1925 డిసెంబరులో  లాంఛనంగా ఆరంభమైన భారత కమ్యూనిస్టు పార్టీ వ్యవస్థాపకుల్లో అత్యధికులు ముస్లింలు. (అహమ్మద్ హసన్, హస్రత్ మొహానీ, రఫీక్ అహమ్మద్, సుల్తాన్ అహ్మద్ ఖాన్, ముజఫర్ అహ్మద్, ఖాజీ నజ్రుల్ ఇస్లాం). నిజానికి అంతకు ముందు తాష్కెంట్ కొండల్లో ప్రాధమికంగా భారత కమ్యూనిస్టు పార్టీని  స్థాపించిన వాళ్ళూ ముస్లింలే. భారత సాహిత్యంలో 1932లోనే  ఆధునిక భావాలను ప్రవేశపెట్టిన అంజుమన్ తరక్కి పసంద్ ముస్సనఫీన్ ఏ హింద్ (భారత అభ్యుదయ సాహిత్య ఉద్యమం) నిర్వాహకుల్లో ఇద్దరు ముగ్గురు తప్ప మిగిలిన వాళ్ళందరూ  ముస్లింలే.   ఇప్పటి సంక్షోభ కాలంలో ముస్లింలకు అలాంటి ఆశ్వాసాన్ని భరోసాను ఇచ్చే స్థితిలో కమ్యూనిస్టు వేదికలు వున్నాయా?  

49.  నేను వారం క్రితం కాంగ్రెస్ మతతత్వం మీద ఒక వ్యాసం రాసాను. ఇప్పుడు కమ్యూనిస్టు శిబిరంలో అంతర్లీనంగా కొనసాగుతున్న  మతతత్వం మీద ఒక విస్తార వ్యాసం రాయాల్సిన అవసరం వున్నది.

50. తరుముకు వస్తున్న నయా మనువాదానికి వ్యతిరేకంగా మార్క్ సిస్టులు,  అంబేడ్కరిస్టులు, సామ్యవాదులు, సామరస్యవాదులు,  పౌర-మానహక్కుల వాదులు, ప్రకృతి ప్రేమికులు అందరూ ఏకమై పోరాడాల్సిన చారిత్రక సందర్భం ఇది. మునుపటి తప్పులు మళ్ళీ జరగకుండా వుండేందుకు గతాన్ని ఒకసారి గుర్తు చేసుకోవాలి.  

రచన : 20 సెప్టెంబరు 2019

ప్రచురణ : https://khanyazdani.blogspot.com , 21 సెప్టెంబరు 2019

కామ్రేడ్ IFTU ప్రసాద్!

 తెలంగాణ రైతాంగ సాయుధ పోరాటం మీద ముస్లిం మైనారిటీల దృక్పథం భిన్నమైనది.

1.     ఉమ్మడి కమ్యూనిస్టు పార్టి చరిత్ర మొత్తంలో  కేవలం ముస్లిం పరిపాలకుడున్న  నిజాం సంస్థానంలో మాత్రమే సాయుధపోరాటం చేసింది.

2.     దేశంలో హిందూ పాలకులున్న సంస్థానాలు వందలాది వున్నా అక్కడ సాయుధ పోరాటం చేయలేదు.

3.     ఆంధ్రమహాసభలో ముస్లిం వ్యతిరేక ధోరణులున్నాయి. రామానంద తీర్ధ ప్రభావం బలంగా వుంది.

4.     పోలీస్ యాక్షన్ లో ముస్లింలు నమ్మలేనంత పెద్ద సంఖ్యలో చనిపోయారు.

5.     కమ్యూనిస్టు ఎజెండాకన్నా హిందూ ఎజెండా బలంగా పనిచేసిందనేది ఆరోపణ.

6.     ఒక దేశంలో /రాజ్యంలో సమసమాజాన్ని స్థాపిస్తామని బయలుదేరి, దాన్ని ఒక పెట్టుబడీదారీ  దేశంలో ఒక రాష్ట్రంగా మార్చగానే సాయుధపోరాట విరమణ ప్రకటించడం ఏం ఘనతా?

7.     విశాలాంధ్ర నినాదం అంతకన్నా బూటకం అని చరిత్ర తేల్చేసింది. తెలంగాణలో ఆ పేరుతో పత్రికను సహితం నడపలేని పరిస్థితి వచ్చింది.

8.     రెండు తెలుగు రాష్ట్రాలనే  నినాదంతో సాగుతున్న పార్టీతో 2009 ఎన్నికల్లో కమ్యూనిస్టులు కూటమి కట్టారు.  ఎక్కడ బయలు దేరారూ? ఎక్కడ ముగిశారూ?

-        ఈ అంశాల మీద మీ అభిప్రాయాలు చెప్పగలరు.